Azərbaycan Milli Antodopinq Agentliyi regionlarda maarifləndirici silsilə tədbirlər həyata keçirir. Qurumun əməkdaşları Təhsil Nazirliyi ilə birgə icra olunan “Dəyərlərə əsaslanan təhsil” adlı proqram çərçivəsində Gəncədə məşqçilər və idmançılarla görüşüblər. İdman liseyində baş tutan antidopinq təlimlərində 9 növ üzrə müxtəlif yaş qruplarından olan idmançılar iştirak edib. Tədbirdə dopinq nədir, antidopinq qayda pozuntuları hansılardır, yarışlara hazırlaşarkən dopinqə düşməmək üçün nə edilməlidir və s. mövzular haqda ətraflı məlumatlar verilib. Eyni zamanda, təlimdə əsrin bəlası sayılan narkotik təsirlər barəsində danışılıb. İdmançılar isə öz növbələrində antidopinqlə bağlı bildiklərini bölüşüblər. Azərbaycan Milli Antidopinq Agentliyinin nümayəndələri Nizami yurdundan sonra Göygöl, Şəmkir və Tovuza səfər edəcək.