Şəkinin Salman Mümtaz küçəsində qəza qeydə alınıb. Kiçik Dəhnə kənd sakini 33 yaşlı Alqayıt Quliyev şinində olan problem səbəbindən VAZ 21015 markalı avtomobilin idarəetməsini itirib. Nəticədə maşın yolun kənarındakı arxa düşüb. Avtomobildə olan sərnişinlər Hamil Abdullayev, Qumru Abdullayeva, Ədalət Mirzəhəsənova müxtəlif dərəcəli bədən xəsarətləri ilə Şəki rayon mərkəzi xəstəxanasına çatdırılıblar. Bakıda yaşlı kişinin xəsarət alması ilə nəticələnən yol-nəqliyyat hadisəsi baş verib. Sabunçu rayonu, Bakıxanov qəsəbəsi, Ramiz Qəmbərov küçəsində yolu keçmək istəyən 65 yaşlı Fəxrəddin Məhərrəmovu metal əşyalar daşıyan "VAZ-2106" markalı avtomobil vurub. Yaralı 3 saylı Kliniki Tibbi Mərkəzə yerləşdirilib. Həkimlərin verdiyi məlumata görə, ona lazımi tibbi yardım göstərilib. Bud sümüyünün sınığı diaqnozu qoyulan xəstənin vəziyyəti orta-ağır kimi qiymətləndirilir. Bakı-Qazax magistral yolunun Ağstafa şəhər ərazisindən keçən hissəsində hərəkətdə olan “Opel” yolu keçmək istəyən, Aşağı Göycəli kənd sakini 47 yaşlı Mürşüd Piriyevi vurub. Yaralı dərhal xəstəxanaya yerləşdirilib. Ona lazımi tibbi yardım göstərilib. Gəncədə təcili tibbi yardım avtomobilinin iştirakı ilə avtoqəza olub. Şəhərin Nizami Gəncəvi prospektində hərəkətdə olan “VAZ 21015” ilə “QAZel” markalı təcili tibbi yardım avtomobili toqquşub. Nəticədə minik avtomobilində olan 2 nəfər xəstəxanaya gətirilib. 34 yaşlı Elnur Əliyev və 29 yaşlı Əhməd Əhmədzadə həkimlər tibbi yardım göstərdikdən sonra ambulator müalicəyə buraxıblar. Faktlar araşdırılır.