İki illik sonra Gəncədə ilk dəfə olaraq Şahin Hərbi İdman Oyunlarının şəhər mərhələsi keçirilib. Məktəblilər arasında təşkil olunan yarışda 44 komanda verilən tapşırıları daha yaxşı yerinə yetirməyə çalışıb. Gəncədəki N saylı hərbi hissədə keçirilən Şahin Hərbi İdman Oyunlarının şəhər mərhələsi Gənclər və İdman Nazirliyi, Səfərbərlik və Hərbi Xidmətə Çağırış üzrə Dövlət Xidməti, Respublika Veteranlar Şurasının birgə təşkilatçılığı ilə baş tutub. Böyüməkdə olan nəslin hərbi-vətənpərvərlik tərbiyəsinə diqqəti artırmaq, məktəbliləri hərbi-idman oyunlarına cəlb etmək, onları ordu sıralarında xidmətə hazırlamağa kömək məqsədilə reallaşan yarışın uzun fasilədən sonra yenidən təşkili yüksək dəyər alıb.
Hərbi hissənin yüksək rütbəli zabitləri və təşkilatçılar tərəfindən iştirakçılara uğurlar arzulandıqdan sonra komandaların təntənəli keçidi olub. 8-10-cu sinif şagirdlərindən təşkil olunan komandalar 4-ü qız, 6-ı oğlan olmaqla formalaşdırılıb.
Əsasnaməyə görə Şahin Hərbi İdman Oyunlarında komandalar  Sıra hazırlığı, fiziki hazırlıq, manelərin dəf olunması, mülki müdafiə hazırlığı və çadırın qurulması mərhələləri üzrə mübarizə aparıblar. Qalib komanda aprelin sonunda zona yarışında iştirak edəcək.

Elnur Vahidoğlu