Dövlət İmtahan Mərkəzi tərəfindən ali təhsil müəssisələrinin magistraturalarına qəbul imtahanı keçirilib. Magistratura səviyyəsinə qəbul imtahanı respublikanın 7 şəhər və rayonunda, o cümlədən Gəncədə də təşkil olunub. Nizami yurdunda imtahanlar 5 binada baş tutub. Ölkənin ikinci böyük şəhərində imtahanda iştirak etmək üçün 1323 bakalavr ərizə təqdim edib. Ümumilikdə respublika üzrə imtahanda 17705 bakalavrın iştirakı planlaşdırılırdı. İlkin məlumatlara əsasən, 1 nəfərdə mobil telefon aşkarlandığı üçün imtahandan xaric edilib. İyunun 12-dən etibarən DİM-də imtahan protokollarının və cavab kartlarının emalı aparılacaq. İmtahan nəticələrinin yaxın 2-3 gün ərzində elan edilməsi nəzərdə tutulur.