Çinin külək turbinləri ilə Günəş elektrostansiyaları ölkədəki hər bir yaşayış evini elektrik enerjisi ilə təmin edəcək qədər enerji generasiya edirlər. Bu barədə xəbəri Bloomberg saytı Çinin Milli Energetika Administrasiyasının (NEA) məlumatlarına istinadən verib. NEA-nın təqdim etmiş olduğu hesabata əsasən külək və Günəş enerjilərinin generasiya etdikləri elektrik enerjisinin həcmi keçən il 21% yüksələrək 1190 teravatt saat təşkil edib. Keçən il Çindəki yaşayış evlərinin ümumi elektrik enerjisi sərfiyyatları isə 1340 teravatt saat təşkil edib. Bu, 2021-ci ildəki göstəricidən 14% yüksəkdir.

NEA-nın təqdim etmiş olduğu bu hesabat Çinin bərpa olunan enerji mənbələri sahəsinə milyardlarla vəsait investisiya etməsinin fonunda bu sahənin ölkədə yüksək sürətlə inkişaf etdiyini göstərir. Bu üsul ilə Çin ekoloji problemləri və daha baha başa gələn ənənəvi yanacaqlardan asılılığı aradan qaldırmağa hədəflənib. Lakin onu da nəzərə almaq lazımdır ki, digər ölkələrdən fərqli olaraq Çində elektrik enerjisi sərfiyyatının çox az hissəsi məhz yaşayış evlərinin payına düşür. Beynəlxalq Enerji Agentliyinin məlumatına əsasən 2020-ci ildə Çində generasiya edilmiş ümumi elektrik enerjisinin yalnız 17%-i yaşayış evləri tərəfindən istifadə edilib.

Həmin ildə Yaponiyada bu göstərici 29%, ABŞ-da isə 39% təşkil etmişdi. Çində elektrik enerjisinin əsas istehlakçısı fabrik ilə zavodlardır. Belə ki, Çində generasiya edilən elektrik enerjisinin 60%-ni məhz istehsalat sahəsi istifadə edir. Burdan da belə qənaətə gəlmək olar ki, bərpa olunan enerji mənbələrininin Çindəki demək olar hər bir yaşayış evini təmiz enerji ilə təmin etdikləri bir vaxtda istehsalçılar lazımi iqtisadi yüksəliş tempini qoruyub saxlamaq üçün hələ də böyük həcmdə yanacaq yandırmalı olurlar.