Gəncədə yaşayış evində güclü partlayış baş verib. Üç nəfərin xəsarət aldığı hadisə nəticəsində binadan təxliyə edilənlər də olub.

Partlayış Ş.İ.Xətai prosspektində, 4 mərtəbəli yaşayış binasının sonuncu mərtəbəsində baş verib. Ümumi sahəsi 40 m2 olan birotaqlı mənzildə qeydə alınan hadisə yanğına səbəb olub. Nəticədə mənzilin yanar konstruksiyaları və ümumi sahəsi 70 m2 olan ikiotaqlı qonşu mənzil də 60 m2 sahədə yanıb. Partlayışın zərbəsindən hər iki mənzilin divarları dağılıb, qapı və pəncərələri çərçivəsindən çıxıb. Hadisə zamanı 59 yaşlı Rüzgar Rzayev və onun həyat yoldaşı 55 yaşlı İradə Rzayeva, eləcə də 40 yaşlı Mehdi Cabbarov ağır yanıq xəsarətləri alıblar.

Yaralılardan vəziyyətləri nisbətən yüngül olan ər-arvad 1 saylı şəhər xəstəxanasının travmatalogiya şöbəsinə yerləşdiriliblər. Onların vəziyyəti ilə yerində maraqlanan Gəncə meri Niyazi Bayramov tezliklə sağalmaları üçün bütün tibbi müdaxilələrin edildiyini bildirib.

Digər yaralı isə Təcili Tibbi Yardım Xəstəxanasının reanimasiya şöbəsinə yerləşdirilib. Şəhər rəhbəri Mehdi Cabbarovun da səhhəti ilə maraqlanıb. Onun paytaxta göndərilməsi istiqamətində tədbirlər görülür.

Elnur Vahidoğlu