Bərdədə güclü yanğın olub. Hadisə Güloğlular kəndində bazar ərazisində qeydə alınıb. Əraziyə Bərdə Rayon Dövlət Yanğından Mühafizə Hissəsinin texnikaları və canlı qüvvəsi ilə yanaşı, mürəkkəbliyi nəzərə alınaraq yanğınla mübarizə məqsədilə Yevlax, Ağdam və Tərtər rayonlarının müvafiq bölmələri də cəlb olunub. Fövqəladə Hallar Nazirliyindən verilən məlumata görə, görülən operativ tədbirlər sayəsində yanğının daha geniş əraziyə yayılmasının qarşısı alınaraq tam söndürülüb. Hadisə nəticəsində ümumilikdə bazarda 101 mağazaya ziyan dəyib. Mağazalardan 80-i tamamı ilə, digər 13-ü isə qismən yanıb. Yanğın təxminən 5 min kvadratmetr ərazini əhatə edib və 2 100 kvadratmetr ərazi yanıb. Hazırda yanğının baş vermə səbəbləri araşdırılır. Hadisə zamanı ölən və xəsarət alan olmayıb.