Azərbaycanın Kəlbəcər bölgəsini tərk edən ermənilərin "yandırılmış torpaq" strategiyası Avropa Komissiyasının diqqətindən yayınmayıb. Bu barədə "Europe Diplomatic" onlayn jurnalında dərc olunan məqalədə deyilir. "Dağlıq Qarabağ və ətraf bölgələrdə vəziyyətlə bağlı tərəflərdən gələn müxtəlif məlumatları və müxtəlif şikayətləri nəzərə alırıq" deyən Avropa Komissiyası mətbuat-katibinin sözləri də bura əlavə olunub. Məqalədə, həmçinin mediada yer alan xəbərlərin ekoloqların böyük narahatlığına səbəb olduğu, meşələrin yandırılması və dağların bənzərsiz flora və faunasının qəsdən məhv edilməsi nəticəsində meydana gələn fəlakətə işarə etdiyi deyilir. "Onlar evləri, bağları, meşələri yandırırdılar və sanitariya problemlərinə səbəb ola biləcək kütləvi şəkildə heyvan kəsiblər" deyə jurnalda qeyd olunub. Vurğulanıb ki,  "yandırılmış torpaq" strategiyası 1977 il Cenevrə Konvensiyalarına əsasən hərbi cinayət hesab olunur.