Azərbaycanın Dağlıq Qarabağ bölgəsinin azərbaycanlı icması “Xankəndi qırğınları” adlı yeni kampaniyaya start verib. Kampaniyanın məqsədi 1988-ci ilin əvvəllərindən etibarən Ermənistan xüsusi xidmət orqanları tərəfindən hazırlanan və həmin ilin sentyabrın 18-dən məqsədli şəkildə Xankəndi şəhərində yaşayan azərbaycanlılara qarşı həyata keçirilən terror hadisələrinə diqqəti cəlb etməkdir. Hazırlanan hər bir çarxın süjet xətti erməni terrorunun qurbanı olan və bu gün də həmin ağrını yaşayan insanların həyat hekayələri üzərində qurulub. İnsan hekayələri üzərində qurulan qısa filimlərin müxtəlif dillərə tərcümə olunması və beynəlxalq təşkilatlara göndərilməsi nəzərdə tutulub. İlk qısa film Xankəndi şəhərində yaşamış Nizami Gəncəvi adına 4 nömrəli orta məktəbdə müəllimə işləmiş Nuridə Məhərrəmovanın həyat hekayəsindən bəhs edir.