Gəncə Şəhər İcra Hakimiyyətinin başçısı Niyazi Bayramovun vətəndaşlarla növbəti görüşü “Mahrasa bağı” adlanan ərazisində təşkil edilib.Sakinlər bildiriblər ki, onları narahat edən əsas problemlərdən biri mavi yanacağın təziqinin aşağı olması və suyun fasilələrlə verilməsidir. 1 nömrəli marşrut xəttinin uzadılmasını istəyən sakinlər, 17 nömrəli marşrut xətti ilə hərəkət edən avtobusların qrafikindən də şikayətləniblər. Mahrasa bağının ətrafındakı Təbriz, Rəfibəyli və Eminbəyli küçələrində asfalt işlərinin görülməsini müsbət qarşılayan sakinlər, məhəllədaxili yolların da səligəyə salınmasını və gecə işıqlanması sisteminin qurulmasını xahiş ediblər. Şəhər rəhbərinin diqqətinə çatdırılıb ki, Mahrasa bağında istirahət güşələri də olduqca azdır. Sakinlər ümumi məsələlərlə yanaşı, öz şəxsi problemlərini də dilə gətiriblər. Əksər problemlər yerindəcə öz həllini tapıb. Bəzi məsələlərin araşdırılaraq qanuna uyğun şəkildə həll olunması üçün müvafiq tapşırıqlar verilib.