Azərbaycan Qida Təhlükəsizliyi Agentliyi və Baş İctimai Təhlükəsizlik İdarəsinin əməkdaşları daxil olan məlumat əsasında Tovuz rayonu Qazqulu kəndində vətəndaşa məxsus yük avtomobilinə baxış keçiriblər. Baxış zaman nəqliyyat vasitəsinin yük hissəsində təxmini çəkisi 150 kq olan istifadəyə yararsız, ölmüş iribuynuzlu heyvan cəmdəyi aşkarlanıb. Heyvanın baş nahiyəsinin kəsildiyi, qarın hissəsinin isə kəsilərək çıxarıldığı məlum olub. Həmin cəmdəkdən götürülən nümunələr müvafiq ekspertizanın keçirilməsi üçün Azərbaycan Qida Təhlükəsizliyi İnstitutunun müvafiq laboratoriyasına göndərilib. Faktla bağlı araşdırma davam etdirilir.