Azərbaycanın 10 milyonuncu vətəndaşının anadan olması münasibətilə Gəncədə bir sıra tədbirlər keçirilib. İlk olaraq Şəhər İcra Hakimiyyətinin təşkilatçılığı ilə səhər saatlarından başlayaraq Gəncənin müxtəlif park və xiyabanlarında, o cümlədən Heydər Əliyev Park Kompleksində ümumilikdə 10 mindən artıq ağac və gül kolları əkilib. Aksiyada 2000 nəfərdən artıq insan iştirak edib. Axşam saatlarında isə şəhərin baş meydanında Azərbaycan əhalisinin sayının 10 milyona çatmasına həsr olunan böyük konsert proqramı təşkil olunub. Gəncə Dövlət Filarmoniyasının bədii kollektivinin iştirakı ilə bir-birindən maraqlı musiqi və rəqs nömrələri nümayiş etdirilib. Tədbirə qatılan şəhər ictimaiyyətinin nümayəndələri, bu gün müstəqil Azərbaycanın hər bir vətəndaşının dövlət qayğısı ilə əhatə olunduğunu, əhalinin rifah halının ilbəil yüksəldiyini diqqətə çatdırıblar.