İlk xəbərimiz yol-nəqliyyat hadisələrindəndir. Qəzalar yenə də ağır nəticələnib.

Qəbələ rayonunun Zarağan kəndində rayon sakini Sirus İsmayılovun idarə etdiyi “VAZ-2107” ilə Bakı şəhər sakini Məcid Xəlilovun idarə etdiyi “Toyota” toqquşub. Nəticədə Sirus İsmayılov və sərnişinlərindən Rufan Səmədov hadisə yerində ölüb, digər 1 sərnişini, habelə Məcid Xəlilovun 3 sərnişini xəstəxanaya yerləşdirilib. Ağcabədidə də ölümlə nəticələnən yol qəzası baş verib. Rayonun Hacıbədəlli kəndi ərazisində "VAZ 2107" yolu keçməyə çalışan 66 yaşlı qadını vurub. Ağır xəsarət alan piyada hadisə yerində keçinib. Ağır yol qəzalarından daha biri Bakının Nərimanov rayonunda baş verib. Pərvin Aslanov idarə etdiyi "Ford" markalı avtomobillə Fətəli Xan Xoyski küçəsində hərəkətdə ikən piyada zolağının olduğunu görüb və qəfil əyləci basıb. Bu zaman arxadan gələn, 30 yaşlı Niyazi Səmədovun idarə etdiyi "Hyundai" markalı "Ford"a çırpılıb. "Ford" isə zolaqdan keçən piyadaya dəyib. Nəticədə orta yaşlı qadın xəsarət alaraq xəstəxanaya yerləşdirilib. Abşeron rayonunun Masazır qəsəbəsində də piyadanın vurulması ilə nəticələnən yol-nəqliyyat hadisəsi baş verib. Yolu keçmək istəyən 42 yaşlı Arzu İbrahimlini "Mercedes" markalı minik avtomobili vurub. Sürücü qadına kömək edə bilməyib, çünki müvəqqəti şok vəziyyətinə düşüb. O və yaralı əraziyə cəlb edilən Yol Patrul Xidməti əməkdaşlarının çağırdığı təcili tibbi yardım avtomobili ilə ilə xəstəxanaya çatdırılıb. Sürücüyə ilkin yardım göstərildikdən sonra Abşeron Rayon Polis İdarəsinə aparılıb. Sabirabadın Qaragüney kəndində Füzuli rayon sakini Qaraş Quliyev idarə etdiyi “Qazel” markalı avtomobillə yolu keçən Nəsimi kənd sakini, 30 yaşlı Bilal Hadıyevi vurub. Yaralı Şirvan şəhər xəstəxanasının reanimasiya şöbəsinə yerləşdirilib, vəziyyətinin ağır olduğu bildirilir. Faktlar araşdırılır.

Zülfiyyə Telmanqızı