Gənclər və idman nazirliyinin Daşkəsənin Xoşbulaq yaylağında təşkil etdiyi “Gənclərin   yaradıcılıq emalatxanası-2” yay düşərgəsi başa çatıb. Respublikanın müxtəlif  bölgələrindən 100  nəfər istedadlı  gənc müxtəlif yaradıcılıq  sahələri  üzrə bacarıqlarını nümayiş etdirib.

Daşkəsən Gənclərin Təlim və İstirahət Mərkəzində  “Gənclərin yaradıcılıq  emalatxanası – 2”  yay düşərgəsi ikinci ildir təşkil olunur. Ötən ilin avqustunda təşkil edilən ilk layihə kimi 2-cisi də 10 gün davam edib

Yay düşərgəsində təsviri sənət, foto, milli və müasir rəqslər, teatr, kino və jurnalistika  sahəsində  xüsusi istedadı olan  gənclər bir araya gəlib. Burada onların yaradıcılıq imkanları artırılıb, peşəkarlıq səviyyələri yüksəlib, kreativ gənclərin ünsiyyətinə şərait yaradılıb və asudə vaxtları səmərəli təşkil olunub.

Gənclər yaradıcılıq emalatxanaları və müsabiqələrdə, nəzəri və əməli məşğələlərdə, ustad dərslərində iştirak ediblər,  gülüş axşamları, kino seans, stolüstü və intellektual oyunlar, tonqalətrafı yaradıcılıq  gecələri, diskoteka və  konsert  proqramları təşkil olunub.

Düşərgə iştirakçılarının qazandıqları uğurlar, mənimsədikləri vərdişlər təqdim olunan sərgilərdə nümayiş olundu. Bundan başqa onların təqdim etdikləri səhnəciklər, milli  rəqslər,  qısametrajlı sujetlər, müxtəlif mövzuları əhatə edən fotolar təlimlərin uğurlu nəticələri kimi təqdim edildi.