Bankomatdan pul çıxararkən ehtiyatlı olun ki, paytaxt sakininin aqibətini yaşamayasınız. Bakıda qadına qarşı soyğunçuluq edilib. Amma onun çantasını alıb qaçan şəxs çox uzağa gedə bilməyib. Yaxınlıqda xidmət aparan polis imdada vaxtında yetişib. Başqa bir əməliyyatla dayanacaqda qadının telefonunu oğurlayan şəxs də saxlanılıb.

Paytaxt sakini Sədaqət Eminova bankomatlardan birindən pul çıxarıb evə gedən zaman Nəsimi rayonu Səməd Vurğun küçəsində naməlum şəxs ona qarşı zor tətbiq edib, içərisində 682 manat pul və dəyəri 300 manat olan mobil telefon olan əl çantasını zorla alaraq qaçmağa cəhd göstərib. Zərərçəkənin köməyinə yaxınlıqda xidmət aparan Nəsimi Rayon Mühafizə İdarəsinin əməkdaşı polis baş serjantı Şakir Həsənov çatıb.

Polis əməkdaşı qadının çantasını alıb qaçan şəxsi hadisə yerindən bir neçə yüz metr kənarda yaxalayaraq maddi sübutlarla birlikdə yaxınlıqdakı polis bölməsinə təhvil verib.

Araşdırmalarla hadisəni törədən şəxsin Xızı rayon sakini Rzaqulu Allahquliyev olduğu məlum olub. Polis əməkdaşları tərəfindən həyata keçirilən digər əməliyyat-axtarış tədbirləri nəticəsində isə ictimai nəqliyyatda və vətəndaşların sıx olduğu yerlərdə cibgirlik edən Astara rayon sakini, keçmiş məhkum Heydər Əhmədov saxlanılıb. Onun Nəsimi rayonu ərazisində yerləşən dayanacaqlardan birində avtobus gözləyən xanım sərnişinin cibindən mobil telefon oğurladığı məlum olub.

Heydər Əhmədov bu ilin yanvarında Bakı Metropolitenində qatarda cibgirlik etdiyi üçün saxlanılıb və məhkəmənin qərarı ilə 2 min manat cərimələnərək aprel ayında azadlığa buraxılıb. Hər iki faktla bağlı Cinayət Məcəlləsinin müvafiq maddələri ilə cinayət işi başlanılıb, araşdırmalar aparılır. Soyğunçuluq və cibgirlik etməkdə şübhəli bilinən bu iki şəxsin əməllərindən zərərçəkən başqa vətəndaşlar varsa, bu barədə Daxili İşlər Nazirliyinin “102” Zəng Mərkəzinə və ya ərazi üzrə polis idarəsinə müraciət edə bilərlər.
 

Zülfiyyə Telmanqızı