Astaranın Kijəbə qəsəbəsi ərazisində “UAZ” dərəyə aşıb. Nəticədə avtomobildə olan 22 yaşlı İlahəddin Qasımov, 32 yaşlı Bəhruz Hüseynov, onun həmyaşıdı Salam Qasımov, 31 yaşlı Ramin Qasımov və sürücü 48 yaşlı Şəmsəddin Qasımov xəsarət alıblar. Yaralılar Lənkəran Rayon Mərkəzi Xəstəxanasına çatdırılıblar. Sürücünün vəziyyəti daha ağır qiymətləndirilir. İlkin ehtimala görə, sürücü Şəmsəddin Qasımovun ürəktutması olub və qəza da bu səbəblə baş verib. Avtomobil idarəetmədən çıxıb. Bakının Sabunçu rayonunda isə iki nəfərin xəsarət alması ilə nəticələnən yol-nəqliyyat hadisəsi baş verib. Avtoqəza Heydər Əliyev prospektində, Sabunçu dairəsi yaxınlığında qeydə alınıb. Eltürk Eyvazzadə "Lada Priora" markalı avtomobildə idarəetməni itirib, nəticədə nəqliyyat vasitəsi dəmir çəpərlərə çırpılıb. ilkin ehtimala görə, sürücü Bakıxanov qəsəbəsinə aparan Elşən Mehdiyev küçəsinə dönmək istəyib və bu vaxt düzgün manevr etmədiyi üçün qəza qaçılmaz olub. Nəticədə sürücü və sərnişini xəsarət alıblar. Daha bir qəza Yevlaxda olub. Rayon sakini 28 yaşlı Rəşad Ağayev "Daewoo" markalı avtomobili yol kənarındakı maneəyə çırpıb. Bu zaman özü, sərnişini və həmyerlisi 36 yaşlı Əsgər Bağırov yaralanıb. Xəsarət alan şəxslər xəstəxanaya aparılıblar. Müayinə zamanı hər ikisinin sərxoş olduğu üzə çıxıb. Vəziyyətləri ağırdır. Şəkinin M.F. Axundov prospektində piyadavurma hadisəsi baş verib. Şəhər sakini 17 yaşlı Rəsul Məmmədzadəni avtomobil vurub. O, sol budun qapalı travması diaqnozu ilə MRX-ya yerləşdirilib. Vəziyyəti sabit qiymətləndirilir. Faktlar araşdırılır.

Zülfiyyə Telmanqızı