• KƏPƏZ TV
    canlı yayım
Bu günə xəbərlərin oxunma sayı: 2127
— 06.05.2015 19:52

Lənkəranda ağır yol nəqliyyat hadisəsi törədən şəxsin məhkəmə prosesi başa çatıb

Lənkəran Ağır Cinayətlər Məhkəməsində ağır yol nəqliyyat hadisəsi törətməkdə təqsirli bilinən Bakı şəhər sakini, 1987-ci il təvəllüdlü Asim Abuşovun cinayət işi üzrə məhkəmə prosesi başa çatıb. 

Asim Abuşov 3 iyul 2014-cü il tarixdə, saat 22:00 radələrində Zərdab-Ucar yolunun 10-cu kilometrliyində, Ucar rayonunun Qazyan kəndi ərazisində idarə etdiyi VAZ-2107 markalı minik avtomobili ilə qarşı tərəfdən gələn Ətraf İsmayılovun sürdüyü VAZ-2107 markalı avtomobili ilə toqquşub. Daha sonra idarə etməni itirən Asim Abuşov Araz Babayevin idarə etdiyi “Mercedes Benz-180” markalı avtomobillə də toqquşub. 

Hadisə nəticəsində Asim Abuşovun avtomobilində olan sərnişini Aygün Abuşova, Arzu Mammədova ağır yaralanıblar. Hər iki yaralıya tibbi yardım göstərilsə də, Arzu  Mammədova dünyasını dəyişib. 

İstintaq araşdırması nəticəsində məlum olub ki, qəza hadisəsi baş verən zaman Asim Abuşov sərxoş olub və sürət həddini aşması nəticəsində bir nəfərin ölümü, bir nəfərin yaralanıb. O, ağır qəzanın baş verməsində təqsirli bilinib. O, Cinayət Məcəlləsinin 263-1.3-cü (yol hərəkəti qaydalarını sərxoş vəziyyətdə pozma, ehtiyatsızlıqdan zərərçəkmiş şəxsin ölümünə səbəb olduqda) maddəsi ilə ittiham edilib. 

Hakim Oruc Cəlilovun sədrliyi ilə keçirilən prosesdə təqsirləndirilən şəxsə hökm oxunub. Məhkəmənin hökmü ilə Asim Abuşov 5 il 6 ay müddətinə azadlıqdan məhrum edilib.